ბოლო წელი ეროვნულ გუნდში - მარტა სანაკრებო კარიერას ასრულებს

ქალთა ფეხბურთის ყველა დროის ერთ-ერთმა საუკეთესო ფეხბურთელმა, მარტამ, სანაკრებო კარიერის დასრულება დააანონსა. 38 წლის თავდამსხმელის თქმით, ის ეროვნულ გუნდს წელს დატოვებს.

მარტას, რომელიც 116 გოლით ბრაზილიის ეროვნული ნაკრების ყველა დროის საუკეთესო ბომბარდირია, 5 ოლიმპიადაზე აქვს ნათამაშები, რომელთაგან 2004 და 2008 წლებში, ,,სელესაოსთან'' ერთად, ვერცხლის მედალი მოიპოვა. გარდა ამისა, ის 17 გოლით მსოფლიო ჩემპიონატის ყველა დროის საუკეთესო მეგოლეცაა. მარტა არის პირველი ფეხბურთელი, რომელმაც გოლი 5 სხვადასხვა მუნდიალზე გაიტანა.

ლეგენდარული თავდამსხმელი ფიფამ მსოფლიოს საუკეთესო ფეხბურთელად 6-ჯერ დაასახელა. ფეხბურთის ასოციაციათა საერთაშორისო ფედერაციის ინიციატივით, 2025 წლიდან ქალთა ფეხბურთში გატანილი საუკეთესო გოლისთვის მოთამაშეები ,,მარტას ჯილდოს'' მიიღებენ.

ბრაზილიელი 2017 წლიდან ,,ორლანდო პრაიდში'' თამაშობს, მის ანგარიშზე მიმდინარე სეზონში ჩატარებულ 5 შეხვედრაში 2 გოლია.

• ბრაზილიის ეროვნული ნაკრები ოლიმპიადის C ჯგუფში იაპონიასთან, ნიგერიასთან და ესპანეთთან ერთად იასპარეზებს და პირველ შეხვედრას 25 ივლისს ნიგერიის წინააღმდეგ გამართავს.