ლუის ენრიკე: ,,30 წელზე მეტია ფეხბურთში ვარ, მაგრამ ამის ახსნა არ შემიძლია''
,,პარი სენ ჟერმენის'' მთავარმა მწვრთნელმა, ლუის ენრიკემ, მადრიდის ,,ატლეტიკოსთან'' წაგებულ მატჩზე ისაუბრა. ესპანელი სპეციალისტის თქმით, მისი გუნდი მეტოქეზე ბევრად უკეთესი იყო და მისთვის შედეგი სრულიად აუხსნელია:
,,უბრალოდ, სიტყვები არ მყოფნის... ვფიქრობ, სამივე საშინაო მატჩში მეტოქეებზე ბევრად ძლიერები ვიყავით, მაგრამ ამჯერად არ გაგვიმართლა.
მუშაობას გავაგრძელებთ, 4 შეხვედრა დაგვრჩა და ბოლომდე ვიბრძოლებთ, თუმცა 30 წელზე მეტია ფეხბურთში ვარ და ამის ახსნა არ შემიძლია. ეს დიდი უიღბლობაა! მეტოქეზე უკეთესად ვითამაშეთ და შედეგი სრულიად უსამართლოა.'' - ლუის ენრიკე
ლუის ენრიკეს ჟურნალისტმა მისი ტაქტიკის ცვლილებასა და 9-იანით შესაძლო თამაშზე ჰკითხა, რაზეც ესპანელმა უპასუხა:
,,მომიყვანეთ ეს თავდამსხმელი, თუ გყავთ! სად ვიშოვო? მე ჩემი იდეების ერთგული ვრჩები. ყველა შედეგზე პასუხისმგებლობას საკუთარ თავზე ვიღებ!'' - ლუის ენრიკე
ჩემპიონთა ლიგის მე-4 ტურში ,,პარი სენ ჟერმენმა'' ,,ატლეტიკოს'' უმასპინძლა და 1:2 დამარცხდა. პარიზული გუნდი, რომელიც 4 ქულით სატურნირო ცხრილის 25-ე პოზიციაზეა, ლიგის მომავალ მატჩს 26 ნოემბერს, მიუნხენის ,,ბაიერნთან'' სტუმრად გამართავს.
😡 Tremendo enfado de Luis Enrique tras caer en el último minuto ante el Atleti: "Llevo 30 años en el fútbol y no consigo explicar esto. Es mala suerte. Hemos sido infinitamente superiores a nuestros adversarios" #UCL pic.twitter.com/X7W0AFaHEP
— MARCA (@marca) November 6, 2024
სხვა სტატიები
