კომომ ნაპოლი გააგდო და იტალიის თასის ნახევარფინალში გავიდა

კომო იტალიის თასის ნახევარფინალში 40 წლის შემდეგ პირველად გავიდა. სესკ ფაბრეგასის გუნდმა, ანტონიო კონტეს ნაპოლი "დიეგო არმანდო მარადონაზე" დაამარცხა და კლუბისთვის კიდევ ერთი ისტორიული თარიღი მონიშნა.

მატჩი ფრედ 1:1 დასრულდა, პენალტების სერიაში კი კომომ 7:8 გაიმარჯვა - თერთმეტმეტრიანები (ნაპოლიდან) ლუკაკუმ და ლობოტკამ გააფუჭეს. ნაპოლის, ტრავმების გამო, უმნიშვნელოვანესი მოთამაშეები დააკლდა, ხოლო კომო კარგად დასვენებული იყო (სერია A-ში მილანთან მატჩის გადადების შემდეგ).

კომო ნახევარფინალში ინტერს დაუპირისპირდება - ეს ფაზა 2-თამაშიანი იქნება და პირველი მატჩი 4 მარტს გაიმართება. ბადის მეორე მხარეს, ატალანტა ნახევარფინალში ბოლონიასა და ლაციოს შორის გამარჯვებულს ელოდება.