"იუვენტუსმა პირველი ნაბიჯი უკვე გადადგა და უახლოეს თვეებში შესაძლოა გარიგებაც შედგეს" - იტალიური გამოცემა

ტურინის "იუვენტუსი" ანდრია ბართიშვილის შეძენით ინტერესდება, ინფორმაციას Tuttosport აქვეყნებს. 16 წლის ფეხბურთელის ტრანსფერზე ტურინული გუნდის სპორტული დირექტორი, კრისტიანო ჯუნტოლი აქტიურად მუშაობს, წყაროს ცნობით ისინი მუდმივ კომუნიკაციაში არიან მამუკა ჯუღელთან და კრისტიან ძაკარდოსთან, სწორედ იმ ხალხთან ვინც ხვიჩა კვარაცხელიას ტრანსფერი "ნაპოლიში" სისრულეში მოიყვანა.

ახალგაზრდა ქართველი ფეხბურთელით მრავალი ევროპული კლუბი ინტერესდება, მაგრამ "იუვენტუსმა" პირველი ნაბიჯი უკვე გადადგა და უახლოეს თვეებში შესაძლოა გარიგებაც შედგეს.

ანდრია ბართიშვილი, პოზიციით შემტევი ნახევარმცველი როგორც უკვე ვთქვით 16 წლისაა, ის თბილისის "დინამოს" აღზრდილია და ამჟამად ფოთის "კოლხეთში" ირიცხება. საქართველოს 17-წლამდელთა ნაკრების ფეხბურთელია, სადაც 4 მატჩში მიუღია მონაწილეობა და 2 გოლი გაიტანა.