'იტანჯება და უმძიმესი ფსიქოლოგიური ტრავმა მიადგა' - ანდორას მცველმა მეკარე დაიცვა

ანდორას ცენტრალურმა მცველმა - ლაუტარო სპაცმა, სოციალურ ქსელში საჯაროდ დაიცვა თავისი თანაგუნდელი და მეგობარი, მეკარე ხესუს ოვონო.

მისი ეს განცხადება მოჰყვა ორშაბათს მომხდარ ტრაგიკულ ინციდენტს, როდესაც ოვონო ტენერიფეს თავდამსხმელ ხესუს დე მიგელს მოედანზე შეეჯახა - ფეხბურთელი მეორე დღეს მიღებული დაზიანებებით გარდაიცვალა. მომხდარის შემდეგ ოვონომ ინსტაგრამის ანგარიში გააუქმა, რადგან ინტერნეტში მასობრივი ბულინგის მსხვერპლი გახდა, სადაც ზოგიერთი მომხმარებელი მას „მკვლელსაც“ კი უწოდებდა. ანდორას ხელმძღვანელობის განცხადებით, კლუბი ფსიქოლოგიურ დახმარებას უწევს ყველა იმ წევრს, ვისაც ეს ტრაგედიის ფონზე სჭირდება.

სპაცის თქმით, ოვონო ამ კვირაში განვითარებული მოვლენებით განადგურებულია.

ტრაგედიით გამოწვეული ღრმა მწუხარების გამო, ხესუს ოვონოს მხარდაჭერა ეკვატორული გვინეის ფეხბურთის ფედერაციამაც გამოუცხადა. ფედერაციის ოფიციალურ განცხადებაში აღნიშნულია, რომ 25 წლის მეკარე, რომელსაც ეროვნულ ნაკრებში 47 მატჩი აქვს ჩატარებული, უმძიმეს ემოციურ მდგომარეობაშია.

მომხდარ ტრაგედიასთან დაკავშირებით ესპანეთის ეროვნულმა პოლიციამ გამოძიება უკვე დაიწყო.