ინიაკი უილიამსმა ჟირონას 5-მატჩიანი მოგებათა სერია დაასრულა

ესპანეთის ლა ლიგის მიმდინარე სეზონში, "ჟირონა" ფანტასტიკურად ასპარეზობს. ჩემპიონატის დაწყებამდე ნაკლებად თუ ვინმე წარმოიდგენდა, რომ 14 ტურის შემდეგ, "რეალსა" და "ჟირონას" ქულების თანაბარი რაოდენობა ექნებოდათ და სატურნირო ცხრილში 1-2 ადგილს გაიყოფდნენ.

ფეხბურთის ხიბლიც ხომ ესაა და სწორედ ამიტომ გვიყვარს სპორტის ეს სახეობა - "ჟირონამ" ირწმუნა, რომ სასწაულის მოხდენა შესაძლებელია და საკუთარ გულშემატკივარს დაუვიწყარ დღესასწაულს უწყობს. მე-14 ტურის მატჩამდე, "ჟირონას" 5-მატჩიანი მოგებათა სერია ჰქონდა და "ბილბაოსთან" გამარჯვების შემთხვევაში, "სამეფო კლუბს" კვლავ 2-ქულიანი სხვაობით გაუსწრებდა, რის შედეგადაც სატურნირო ცხრილის სათავეში დარჩებოდა.

"ჟირონა" მეთოდურად უტევდა და ცდილობდა, რომ "ბილბაოს" დაცვის ხაზი გაერღვია, რაც საბოლოოდ 55-ე წუთზე, ვიქტორ ციგანკოვის გოლით დასრულდა. თითქოს ყველაფერი იქით მიდიოდა, რომ მასპინძლები ზედიზედ მეექვსე გამარჯვებას მოიპოვებდნენ, თუმცა 67-ე წუთზე, ინიაკი უილიამსმა წონასწორობა აღადგინა და ტაბლოზე საბოლოო ანგარიში (1:1) დააფიქსირა.