გალათასარაის მორიგი მეგა ტრანსფერი?! - ყველაფერი კაზემირომ უნდა გადაწყვიტოს

ბრაზილიის ეროვნული ნაკრებისა და "მანჩესტერ იუნაიტედის" ფეხბურთელი - კაზემირო შესაძლოა "გალათასარაიში" გადავიდეს. ამის შესახებ ინფორმაცია თურქულ მედიაში ვრცელდება და ბრიტანული მედიებიც ადასტურებენ, რომ თურქულ გრანდს 32 წლის ბრაზილიელი საყრდენის შეძენა სურს და პირველი ოფიციალური შეთავაზება უკვე გაკეთებულია.

გავრცელებული ინფორმაციის თანახმად, "გალათასარაის" მესვეურებს სურთ, რომ ოსიმენის მეგა ტრანსფერის შემდეგ, გუნდი კიდევ უფრო გააძლიერონ, ამჯერად ნახევარდაცვის ზონაში.

საუბარია 1 წლიან იჯარაზე გამოსყიდვის საშუალებით. პარალელურად ბრიტანულ მედიაში ვრცელდება ინფორმაცია იმის შესახებ, რომ "ლივერპულთან" საზარელი მატჩის შემდეგ, "წითელ ეშმაკებს" სურთ კლუბიდან კაზემირო გაუშვან და მის ნაცვლად თავისუფალი აგენტის სტატუსით მყოფი - ადრიან რაბიო დაიმატონ.

აქვე შეგახსენებთ, რომ თურქეთში სატრანსფერო ფანჯარა 13 სექტემბერს იხურება.

კაზემირო "წითელი ეშმაკების" რიგებში 2022/2023 წლების სეზონიდან ირიცხება, რა პერიოდშიც მან 87 მატჩის ჩატარება შეძლო. კაზემიროს ანგარიშზე 12 გატანილი გოლი და 9 შესრულებული საგოლე გადაცემაა.