"ესპანეთის წინააღმდეგ, გერმანიაში, თავს საკუთარ მოედანზე ვგრძნობდით" - გიორგი ქოჩორაშვილი

1 წთ

საქართველოს ეროვნულმა ნაკრებმა სადებიუტო ევროპის ჩემპიონატზე 1/8-ფინალში ითამაშა. მოწინააღმდეგე ესპანეთი იყო, რომელიც ტურნირის ერთ-ერთი მთავარი ფავორიტია. შეხვედრა ჩვენი გოლით დაიწყო, თუმცა, ესპანეთმა 4 გოლის გატანა შეძლო და 1/4-ფინალშიც გავიდა.

მთელი ტურნირის განმავლობაში ჩვენი გუნდის მამოძრავებელი ძალა იყო გიორგი ქოჩორაშვილი. 25 წლის ნახევარმცველმა სადებიუტო ევროპის ჩემპიონატის შესახებ საკუთარ სოციალურ ქსელში დაწერა.

დაუვიწყარი თავგადასავალი გერმანიაში დასრულებულია. დებიუტანტი გუნდი, რომელმაც გააცნო ყველას თავი საკუთარი იდენტობით. 26 მარტის მატჩის დასრულების შემდეგ, ყველას ერთი მიზანი გვქონდა: ტურნირზე ჩვენი გამოსვლის შემდეგ ქართველ ხალხს თავი ამაყად ეგრძნო და ვფიქრობ, ეს მოვახერხეთ.

ყველა ის წამი, რომელიც შეკრების დაწყების დღიდან ერთად გავატარეთ, მართლაც უნიკალური და დაუვიწყარი იყო. ვფიქრობ, ამ ერთიანობამ მოიტანა ის შედეგი, რომლითაც დღეს შეგვიძლია ბედნიერები ვიყოთ, ხვალინდელი დღის უკეთესი შედეგის იმედად.

ბევრჯერ მითქვამს და არასდროს დავიღლები იმის თქმით, რომ მსოფლიოში საუკეთესო გულშემატკივარი გვყავს, რომელიც არასდროს გვტოვებს მარტო. ევროპის ჩემპიონატის 1/8 ფინალში ესპანეთის წინააღმდეგ, გერმანიაში, თავს საკუთარ მოედანზე ვგრძნობდით. მადლობა ყველას მხარდაჭერისთვის, ტრიბუნიდან, ქუჩის ეკრანებიდან, თუ სახლიდან, ყველა ძალა ჩვენამდე სრული სიზუსტით მოვიდა და ამან ყველა ეტაპზე გაგვაძლიერა.

მომავალ შეხვედრამდე. - წერს გიორგი ქოჩორაშვილი