ერთადერთი ქვეყანა დედამიწაზე, რომელსაც საფეხბურთო ნაკრები არ ჰყავს
მარშალის კუნძულები ერთადერთი ქვეყანაა დედამიწაზე, რომელსაც ეროვნული საფეხბურთო ნაკრები არ ჰყავს, თუმცა, იმედოვნებენ, რომ ეს რეალობა მალე შეიცვლება.
ვულკანური კუნძულების ჯგუფისგან შემდგარი ქვეყნის ოკუპაცია, მეორე მსოფლიო ომის დროს აშშ-მ მოახდინა, 1986 წელს, კი მარშალის კუნძულებმა დამოუკიდებელი ქვეყნის სტატუსი მოიპოვა. მარშალის კუნძულების წარმომადგენლები იმედოვნებენ, რომ ეროვნული საფეხბურთო ნაკრების შექმნის შემდეგ, FIFA-ს წევრის სტატუსს მიიღებენ და მსოფლიო ჩემპიონატის საკვალიფიკაციო ეტაპზე თამაშს შეძლებენ.
კუნძულებზე ფეხბურთის განვითარებას, ინგლისელი ლოიდ ოუერსი კურირებს, რომელიც ქვეყნის ფეხბურთის ფედერაციის ტექნიკურ დირექტორად დაინიშნა. BBC-სთან საუბარში, ოუერსმა აღნიშნა, რომ სწორი მენეჯმენტის პირობებში, 10 წელში მარშალის კუნძულებს ძლიერი საფეხბურთო ნაკრები ეყოლება.
ვიცით, რომ გვინდა გლობალური ფეხბურთის ნაწილი გავხდეთ. გვსურს მივიღოთ, FIFA-ს წევრობა და მსოფლიო ჩემპიონატის საკვალიფიკაციო ეტაპზე ვითამაშოთ. ვფიქრობ, თუ შევძლებთ იმ დასახული მიზნების განხორციელებასა და განვაგრძობთ პროგრესს, 10 წელში ეს ყველაფერი შესაძლებელი იქნება. - ლოიდ ოუერსი.
