დენის ბერგკამპს კუპიურაზე გამოსახავენ
არსენალისა და ნიდერლანდების ნაკრების ლეგენდარული ფეხბურთელის, დენის ბერგკამპის გამორჩეულ გოლს, რომელიც მან არგენტინის ნაკრებს გაუტანა, კუპიურაზე აღბეჭდავენ.
1998 წლის მსოფლიო ჩემპიონატის მეოთხედფინალურ მატჩში, 89-ე წუთზე ბერგკამპმა არგენტინას გამარჯვების გოლი გაუტანა, გოლის სირთულისა და ესთეტიკის გათვალისწინებით, ეს მომენტი მსოფლიო ჩემპიონატების ერთ-ერთი ყველაზე "იკონური" მომენტია.
განსაკუთრებული 8-ევროიანი კუპიორა ნიდერლანდების მთავრობის ორგანიზებით დაიბეჭდა. ინოვაციური ჰოლოგრაფიული დიზაინის წყალობით, თითოეულ გამოშვებულ კუპიურას თავისი ელექტრონული ეკვივალენტი ექნება და ციფრულ ხელოვნების ნიმუშად ჩაითვლება.
მიმოქცევაში გამოსული კუპიურები 23-კარატიანი ოქროს ფურცლით დაიბეჭდება, შედეგად მომავალ კვირას, ამსტერდამში დებიუტის შემდეგ, კუპიურები კოლექციონერებისთვის სასურველი შენაძენი გახდება. კუპიურის ონლაინ შეძენა 24.95 ევროდ იქნება შესაძლებელი. დენის ბერგკამპი პირველი ფეხბურთელია, რომელსაც ნიდერლანდებში კუპიურაზე გამოსახავენ.