"ჩვენი მიზანი ამ ლიგაში კარგი თამაშის ჩვენებაა" - ვილი სანიოლი

2 საათის წინ ფეხბურთი

1 წთ

დღეს, ბელგიის დედაქალაქ ბრიუსელში ერთა ლიგის 2026/2027 წლების სეზონის წილისყრა გაიმართა, სადაც საქართველოს ეროვნული ნაკრების მეტოქეები გაირკვა.

საქართველო B ლიგის D ჯგუფში მოხვდა, რომელიც ასე გამოიყურება:

უნგრეთი
უკრაინა
საქართველო
ჩრდილოეთ ირლანდია

საქართველოს ეროვნული ნაკრების მთავარმა მწვრთნელმა, ვილი სანიოლმა წილისყრის შემდეგ მედიასთან ისაუბრა:

ერთა ლიგის ბოლო გათამაშებაში ვნახეთ, რომ უკრაინა საკმაოდ რთული მეტოქეა. უნგრეთი ცოტა ხნის წინ, A ლიგაში ასპარეზობდა, ხოლო ბოლო 10 წლის განმავლობაში კარგი შედეგები ჰქონდა, ასე რომ, რთული მატჩები გველის. ჩრდილოეთ ირლანდია კი ბრიტანული სტილის, მაღალი ინტენსივობით მოთამაშე გუნდია, რომელსაც სიურპრიზების შემოთავაზება შეუძლია, თუმცა, ჩვენი მიზანი ამ ლიგაში კარგი თამაშის ჩვენებაა. საქართველოს ნაკრების განვითარების გასაგრძელებლად აუცილებელია მაღალ დონეზე თამაში, ამიტომ ამ ლიგაში ადგილის შენარჩუნება მნიშვნელოვანია.

ნებისმიერი შანსი, რომელიც დიდ ტურნირთან დაგვაახლოვებს, სრული კონცენტრაციითა და მოტივაციით უნდა გამოვიყენოთ. რა თქმა უნდა, ფეხბურთელები მოტივირებულები იქნებია და იმედი მაქვს, ამას სექტემბერში წარმოაჩენენ.

- ვილი სანიოლი - საქართველოს ეროვნული ნაკრების მთავარი მწვრთნელი

View this post on Instagram

A post shared by Georgian Football Team (@nakrebi)

შეგახსენებთ, რომ კალენდარში ცვლილებაა და გასული წლებისგან განსხვავებით უეფამ გადაწყვიტა, რომ სანაკრებო მატჩებისთვის 2 ფანჯარა იქნება გამოყოფილი.

კერძოდ, ფიფას გადაწყვეტილებით 2026 წლიდან სექტემბრისა და ოქტომბრის სანაკრებო შესვენებები გაერთიანდება და ნაკრებები 21 სექტემბრიდან 6 ოქტომბრამდე 4 შეხვედრას გამართავენ.

როგორც მოგეხსენებათ, აქამდე ეროვნული ნაკრებები 2 მატჩს სექტემბერში ატარებდნენ, 2-ს კი ოქტომბერში ახლა კი ეს შეხვედრები აღნიშნული თარიღების პერიოდში გადანაწილდება. უცვლელად დარჩა ნოემბერში ჩასატარებელი 2 მატჩის განრიგი, რომელიც 9-დან 17-მდე გაიმართება.

ზაალ ჩიხლაძე

სხვა სტატიები

"სამწუხაროდ კვლავ საქართველოს წინააღმდეგ გვიწევს თამაში" - სერგეი რებროვი

საქართველოს ნაკრების მეტოქეები ერთა ლიგაზე ცნობილია