"ჩვენ ჯერ არ დაგვიმთავრებია ერთად თამაში" | მბაპემ ვრცელი წერილი გამოაქვეყნა
მსოფლიო ჩემპიონატის დრამატული ფინალის, უდიდესი ემოციური დაძაბულობისა და ეროვნულ ნაკრებთან ერთად სამშობლოში დაბრუნების შემდეგ, კილიან მბაპე გულშემატკივარს უკვე მშვიდ, დაწყნარებულ გონებაზე მიმართავს. საფრანგეთის ნაკრების კაპიტანმა, რომელმაც ტურნირის საუკეთესო ბომბარდირის ტიტული მოიპოვა, სოციალურ ქსელში გულახდილი წერილი გამოაქვეყნა.
მან შეაჯამა განვლილი გზა, მადლობა გადაუხადა თანაგუნდელებს, შტაბსა და მილიონობით ფრანგ ქომაგს, რომლებმაც ამ ტურნირზე ნაკრებთან ერთად 'იცხოვრეს'.
გთავაზობთ კილიან მბაპეს წერილის სრულ თარგმანს:
მადლობა.
ემოციების, საკუთარ შესაძლებლობებზე გადაბიჯებისა და საფრანგეთის ფერების ტარებით გამოწვეული სიამაყის ერთი თვე. უპირველეს ყოვლისა, იმ ვნების თვე, რომელიც გვამოძრავებს ჩვენ მოედანზე და თქვენ - ეკრანებთან თუ ტრიბუნებზე. აი, რა გამოვიარეთ ერთად - დაუჯერებელი ისტორია.
თასი ვერ წამოვიღეთ, ეს გულს გვტკენს და კიდევ დიდხანს გვეტკინება. საუკეთესო ბომბარდირის ტიტულს სიამაყით ვიღებ, თუმცა არ მოგატყუებთ, თასთან ერთად ბევრად უკეთესი იქნებოდა. შესაძლოა, უფრო ლამაზ ფინალს იმსახურებდით, მაგრამ ისტორიის დასასრულს ყოველთვის თავად ვერ ვირჩევთ - ვირჩევთ იმას, რასაც ამ საქმეში ვდებთ და ჩვენც ყველაფერი გავიღეთ. ამით კი ვამაყობთ.
მადლობა ჩემს თანაგუნდელებს. მათ შრომისმოყვარეობას, სირბილს, პასებსა და იმ გუნდურ სულს, რომელსაც პირველიდან უკანასკნელ მატჩამდე მიჰყავდით, ამდენ გოლს ვერასდროს გავიტანდი. ეს ტიტული იმდენადვე გუნდისაა, რამდენადაც ჩემი.
პატარაობისას მსოფლიო ჩემპიონატზე თამაშზე ვოცნებობდი, თუნდაც ერთხელ, მაგრამ სამჯერ ვითამაშე, ერთი მოვიგე, წელს კი პატივი მხვდა წილად, კაპიტნის სამკლაურით მეთამაშა. ამას არასდროს დავივიწყებ.
თქვენ გვიანობამდე გეღვიძათ, ზოგჯერ შუაღამემდეც კი (საათობრივი სარტყლებიდან გამომდინარე), იმისათვის, რომ მსოფლიოს მეორე მხარეს ჩვენი თამაშისთვის გეყურებინათ. იკრიბებოდით სახლებში, ბარებში, ოჯახთან თუ მეგობრებთან ერთად, მთელ საფრანგეთსა და მის ფარგლებს გარეთ.
სხვები ჩვენთან ძალიან ახლოს იყვნენ სტადიონებზე, მხრებზე მოსხმული დროშებით. ბავშვები ანთებული თვალებით, ქალები და მამაკაცები ყოველგვარი წარმოშობისა და თაობის - ყველანი გაერთიანებულნი ერთი და იმავე სიამოვნებისა და გაზიარების განცდის გარშემო. სწორედ ეს არის ამ სპორტის ძალა.
და თქვენ არასდროს მიგიტოვებივართ, ყველაზე რთულ მომენტებშიც კი, მაშინაც კი, როდესაც ამას ნაკლებად იმსახურებდით. ეს ისტორია მილიონობით ხელმა დაწერა და არა მხოლოდ თერთმეტმა მოთამაშემ მოედანზე - ყველამ, ვისაც ერთი და იგივე ჟინი ამოძრავებდა.
დიდიეს (დეშამს) უკვე ვუთხარი ის, რაც სათქმელი მქონდა და მან ეს იცის. მადლობა მას, მთელ მის შტაბს, ფიზიოთერაპევტებს, მზარეულებს, მწვრთნელებს, მძღოლებს, ყველას, ვისაც ვერავინ ხედავს, მაგრამ ვის გარეშეც არაფერი გამოვიდოდა. ასევე მადლობა მათ, ვინც მასპინძლობა გაგვიწია შეერთებულ შტატებში ამ ტურნირის განმავლობაში.
ფეხბურთი, არსებითად, მაინც თამაშია. თამაში, რომელსაც ძალიან სერიოზულად ვეკიდებით, რომლის დაოსტატებასაც მთელ ცხოვრებას ვუთმობთ, მაგრამ მაინც თამაშია - მარტივი წესებით, რომლებიც არ შეცვლილა მას შემდეგ, რაც თამაში დავიწყეთ: ბურთი, კარები და გოლის გატანის სურვილი. სწორედ ამიტომ გვაერთიანებს ეს თამაში ყველას ერთი და იმავე ვნებით.
ეს მსოფლიო ჩემპიონატი დასრულდა, მაგრამ ისტორია გრძელდება. იქნება სხვა მატჩები, ზაფხულისა თუ ზამთრის სხვა საღამოები, სადაც კვლავ შევიკრიბებით ამ თამაშის გარშემო, იგივე უცვლელი სურვილით.
ჩვენ ჯერ არ დაგვიმთავრებია ერთად თამაში.
მადლობა ყველაფრისთვის - კილიან მბაპე." - კილიან მბაპე
🚨🚨 KYLIAN MBAPPÉ 🇫🇷 ÉCRIT UNE LETTRE AUX FRANÇAIS APRÈS LA COUPE DU MONDE ! 📩🥹
— Actu Foot (@ActuFoot_) July 27, 2026
« MERCI.
Un mois d’émotion. De dépassement. De fierté à porter les couleurs de la France.
De passion, surtout, la même qui nous anime sur le terrain et qui vous anime, devant l’écran comme dans… pic.twitter.com/LHPnae5Pxj
შეგახსენებთ, რომ კილიან მბაპე რეკორდსმენია მსოფლიო ჩემპიონატების ისტორიაში გატანილი 22 გოლით. მან ჯერ მხოლოდ სამ მუნდიალზე ითამაშა (2018, 2022 და 2026 წლებში).
სხვა სტატიები
