ბორდო საფრანგეთის მეოთხე დივიზიონიდან მეექვსე დივიზიონში დაქვეითდა

ოფიციალურად, ფრანგული საფეხბურთო გუნდი ბორდო საფრანგეთის მეოთხე დივიზიონიდან მეექვსე დივიზიონში დაქვეითდა, მიზეზი გუნდში ვალების გადაუხდელობა და დიდი ფინანსური კრიზისია. DNCG-ის სააპელაციო კომიტეტმა ოფიციალურად დაადასტურა, რომ ჟირონდელებმა 10 მილიონი ევროს მოძიება ვალის დასაფარად ვერ შეძლეს, მათთვის ინვესტორის ძებნაც წარუმატებელი აღმოჩნდა. ბორდო საუკეთესო შემთხვევაში რეგიონალურ 1 ლიგაში ითამაშებს.

საფეხბურთო კლუბ ბორდოს პრეზიდენტი ჟერარ ლოპესი ამ დრომდე ცდილობდა ინვესტორის მოძიებას, მაგრამ ყველანაირი მცდელობა უშედეგო აღმოჩნდა და კლუბი გაკოტრების პირასაა.

შეგახსენებთ, რომ ბორდო საკმაოდ ტიტულოვანი კლუბია, მათ ისტორიის მანძილზე 6-ჯერ უზეიმიათ საფრანგეთის ჩემპიონობა, 4-ჯერ მოუგიათ საფრანგეთის თასი, 3-ჯერ საფრანგეთის ლიგის თასი, თითო-თითოჯერ საფრანგეთის ლიგა 2-სა და ინტერტოტოს თასი, ხოლო 3-ჯერ მოიგო საფრანგეთის სუპერთასი.