7-ჯერ არჩეული | ფლორენტინო პერესი ისევ რეალის პრეზიდენტი იქნება

მადრიდის "რეალის" პრეზიდენტი, ფლორენტინო პერესი, კვირას კიდევ ერთი ვადით აირჩიეს ამ თანამდებობაზე და ესპანელი ფუნქციონერის მანდატის ვადა 2029-წლამდე გახანგრძლივდა. როგორც ცნობილია, არჩევნებში მხოლოდ ერთი კანდიდატი იღებდა მონაწილეობას და ფლორენტინოს სრული ნდობა გამოუცხადეს.

პერესი რეალში ჯერ კიდევ 2000 წელს მოვიდა, მეორე ვადით 2004 წელს აირჩიეს, 2 წელში კი თანამდებობიდან გადადგა. ის რეალში 2009 წელს დაბრუნდა და მას შემდეგ კიდევ 5-ჯერ აირჩიეს რეალის საკალათბურთო და საფეხბურთო გუნდების პრეზიდენტად.

რეალის პრეზიდენტად ყოფნის 21 წლის განმავლობაში ორგანიზაციამ სულ 65 ტიტული მოიგო – 37 ფეხბურთში და 28 კალათბურთში.