გრძელდება საფრანგეთში, მეცის 250 ქულიანი ტურნირი, სადაც ასპარეზობას განაგრძობს საქართველოს პირველი და მსოფლიო რეიტინგის 31-ე ნომერი ნიკოლოზ ბასილაშვილი.
ნიკა ტურნირის ¼-ფინალურ ეტაპზეა, სადაც მისი მეტოქე კეი ნიშიკორი იქნება.
შეხვედრა იაპონელ ჩოგბურთელსა და ნიკოლოზ ბასილაშვილს შორის, დღეს 21 სექტემბერს, 20:00 საათზეა ჩანიშნული, თუმცა შესაძლებელია დაწყების დრო შეიცვალოს და უფრო დაგვიანდეს.
კეი ნიშიკორი Vs პეტერ გოიოვჩუკი
გამოცდილმა იაპონელმა, რომელიც მსოფლიო რეიტინგში მე-12 პოზიციას იკავებს, გუშინდელ ორთებრძოლაში გერმანელი გოიოვჩუკი გამოამშვიდობა ასპარეზობას.
პირველ სეტში ვერცერთმა ჩოგბურთელმა ვერ მოახერხა ბრეიკის უპირატესობის მოპოვება, ტაი-ბრეიკზე კი იაპონელმა ჩოგბურთელმა ანგარიშით 7:4 მოახერხა და სეტის საბოლოო ანგარიში 7:6(4) დააფიქსირა.
მეორე სეტში, საწყის 4 გეიმში 3 ბრეიკი შესრულდა, რომელთაგან ორის ავტორი კეი ნიშიკორი გახლდათ, ეს უპირატესობა გადამწყვეტი აღმოჩნდა მატჩის მოსაგებად. შეხვედრის საბოლოო ანგარიში ასე გამოიყურება: 7:6(4), 6:3 - ნიშიკორის სასარგებლოდ.