იანიკ სინერმა კარიერაში პირველი დიდი სლემის ტურნირი მოიგო

ავსტრალიის ღია პირველობას ახალი ჩემპიონი ჰყავს. 22 წლის ამომავალი ვარსკვლავი, იანიკ სინერი დიდი სლემის ტურნირის გამარჯვებული პირველად გახდა. ფინალი უკიდურესად დაძაბული აღმოჩნდა, იტალიელმა საოცარი ქამბექი შეასრულა და მაშინ, როდესაც სეტებში 0-2 აგებდა, ზედიზედ 3 სეტი აიღო და რუს დანილ მედვედევს ჩემპიონობა ჩიბიდან ამოაცალა.

შეხვედრა მედვედევის სრული უპირატესობით დაიწყო და პირველი 2 სეტი ერთნაირი ანგარიშით (6:3/6:3) მოიგო, თითქოს გამარჯვება მარტივად მოდიოდა, თუმცა სწორედ აქ დაიწყო სინერმა თამაშის შემოტრიალება - შემდეგი 2 სეტი უკვე იტალიელმა მოიგო ერთნაირი ანგარიშით (6:4/6:4). მეხუთე, გადამწყვეტ სეტში სინერს 1 ბრეიკის შესრულება ეყო იმისტვის, რომ კარიერაში პირველ გრანდ სლემს დაუფლებოდა (6:3). იანიკი ტურნირზე მეოთხე ნომრად იყო განთესილი და მელბურნში ის თავის პირველ ფინალს თამაშობდა.

იტალიელმა მოთამაშემ შთამბეჭდავი სვლა ნოვაკ ჯოკოვიჩის განადგურებით დაიწყო, რითაც დაასრულა ავსტრალიის ღია პირველობის 10-გზის ჩემპიონი ნოვაკ ჯოკოვიჩის 33-მატჩიანი მოგების სერია. "მელბურნ პარკზე" სინერმა ნახევარფინალი ოთხ სეტში მოიგო. აღსანიშნავია, რომ ჯოკოვიჩს არასოდეს წაუგია ავსტრალიაში მაშინ, როდესაც საუკეთესო ოთხეულში იყო გასული.

მედვედევმა 2021 წელს US Open-ის ტიტული მოიგო, მაგრამ მას შემდეგ 4 სხვა ფინალი დათმო, მათ შორის ავსტრალიაში 2021 და 2022 წლებში.